香港新浪網 MySinaBlog
« 上一篇 | 下一篇 »
妖夜叉 | 25th Nov 2009, 11:49 AM | 若有所思 | (270 Reads)

Picture

 

機會主義者的醜態,每每表現於機遇出現的時候。而機會主義者之醜陋,亦每於計算機遇所可能引起的得失中充分表現出來。

「五區總辭」,從雷聲大雨點少到無雨點可言,然後又因小唐唐的瘋言瘋語讓其死灰復燃,到民主黨的龜縮自閹,當中孰人孰鬼?相信香港市民心中有數。

縱然如此,對所有民主、自由、平等及公義的追隨者而言,民主黨一再表現醜陋,確實應該被重重鞭撻。

從何俊仁、劉慧卿再到司徒華,以至李柱銘最近一直為民主黨的龜縮行徑辯護,市民該不難看到香港民主發展停步不前的主因,並不是受到中央政府的阻撓,而是一眾未打先流尿的「民主」政棍一手促成。所謂中央干預民主發展的論調,實屬多餘,蓋中央尚未硬來,對手卻先自投降,那麼中央政府還有硬來干預的必要嗎?

本來,政府一眾打手如梁振英、譚惠珠以至隱形打手施永青之流已開始佈陣嚴防,卻未料所謂香港「民主」的第一大黨會急遽收兵。未打先降,足顯卑劣無能。更甚者是,自己撤退,還要沿途對衝鋒陷陣者喝罵,把勇敢誓死一拼的義士,打壓作魯莽無知的匹夫。假若他們認為自己言之有理,那麼不禁要問,「智勇雙全」的民主黨,在回歸到現在於香港民主發展的過程裡,到底掙到怎麼樣的豐功偉績?

假如認真去跟民主黨算帳,香港市民確又受過他們不少「恩惠」。從八九民運開始,這些家伙把遊行變成嘉年華會,為了自己的政治利益,多次煽動、濫用市民的熱情為其打槓做勢,卻是最終甚麼也爭取不來。最嚴重者,一方面說「五區總辭」無法達到目的,另方面又希望來年元旦的遊行人數破紀錄。請問,這種荒謬的說法,若非語者癡呆,是否就說明其目的只為撈取政治本錢?(請查閱司徒華的高見,恕難引用!)

再者,民主黨人一再高舉理性,但到底他們懂得何謂理性否?

假如理性代表被打壓迫害不還手的話,相信這不是理性,而是奴性,甚至是比現政府更強的奴性!

那麼,既然民主黨非為民主而來,香港市民為甚麼還要供奉一個垃圾不如的神主牌?

或許,如司徒老伯一番「阿媽原來係女人」所言;「香港的鬥爭不能靠國際影響,要靠自己努力」。也就是說;香港市民要民主,真的只能依靠自己團結出力量,而不是靠追隨一群藉民主發財的垃圾墮海!

早前看過電影《2012 -  末日預言》,非常震撼的畫面。未知民主黨中人看過以後,會否感到民主黨在 2012 立法會選舉的結果同樣令人震撼?


[1]

我對班友仔完全不抱任何希望, 所以對五區總辭冇興趣。班友同共產黨作對, 老實講未夠班。遊行亦冇興趣, 費用做咗人地的籌碼。
2012無明日之後咁振震撼喎, 個人意見。


[引用] | 作者 思見 | 25th Nov 2009 17:28 PM | [舉報垃圾留言]

對所謂民主派我一早已經絕望,靠佢哋爭取就死得,爭取條毛佢哋就叻!

以為社民連出現可以帶來曙光,重新令一眾泛民反思出路。點知班友淨識攪亂自己陣營,真係白癡到無倫!李柱銘被譽為香港民主之父?慳啲啦,連自己曾經大力支持嘅建議都會一手破壞,講乜野民主之父呀?司徒華又話係為民主鞠躬盡瘁、死而後已,我就係怕犯口業都要講;司徒華不如早啲去死!

香港人要自救就真係要團結,不過唔使靠班茂利,只要團結自發對政府採取不合作態度,已足以為自己打開一條生路!

PS:2012 最震撼唔係今日,而係 2012 年 12 月 21 日,等下啦,呵呵。。。

[引用版主回覆] | 作者 妖夜叉 | 25th Nov 2009 19:41 PM

[2]

當民主黨掀去了[民主]的標籤之後,原來跟民建聯那麼接近[看他們怎麼通過西鐵撥款,領匯上市], 為什麼不乾脆選民建聯, 起碼有蛇羹可吃??
或者應該全面放棄一國兩制,找個京官來管,起碼明目張膽貪污腐敗,大家有機可乘


[引用] | 作者 乙人 | 25th Nov 2009 17:40 PM | [舉報垃圾留言]

[3]

我一於唱反調﹐我認為司徒華講得好有道理!(笑)
搞政治﹐唔係貪過癮﹐要講實用。
實用﹐係建基係真正可以撼動建制
例如﹕癱瘓立法會﹑癱瘓政府運作﹑逼使政府係政改方案讓步﹐乃至逼使人大收返2007年個決定...
廢話唔想多講﹐只問一個問題﹕
搞個五區總辭﹐有咩實用﹖
癱瘓立法會﹖癱瘓政府運作﹖逼使政府係政改方案讓步﹖逼使人大收返2007年個決定﹖
如果以上四樣都唔可以﹐就係無實用﹐就係不切實際!
其他見解﹐請睇我篇“五區總辭得啖笑”(又賣廣告)
我就睇下你﹐有邊點可以反駁到我﹖(笑)

文少
[引用] | 作者 文少 | 26th Nov 2009 01:52 AM | [舉報垃圾留言]

文少卒之玩到無地方玩,嚟到我呢殊玩?呢輪少聽佛偈乎?

無問題,我不嬲來者不拒。不過呢,我就唔過去你邊講喇,因為隻揪變圍毆,我咪好無辜?見識過你啲粉絲嘅辯才,一攪唔好來回宇宙幾次我怕暈浪!喺呢度單對單,講乜都得重好啦!

好!言歸正傳。

你話「搞政治﹐唔係貪過癮﹐要講實用」。好喇,咁我想問,當年攪大鳴大放、三反五反,文化大革命,實用嘅地方喺邊到?就係要整死對頭兼要好多人陪葬乎?假設其作用真係咁,點解今日唔攪落去?

我咁講,唔係要反對你講政治要實用,但實用係對變邊個講先?

稍為受過基本教育嘅人,都知喺香港要得到民主係幾咁難,一則中央會好驚,二來本地政府無能,三者有一大班沒卵頭嘅泛民扮代表,再者香港人無膽又無知淨識吹吹水嘅太多,你話點搞好?

好喇,就係因為有咁多難題,所以要逐一解決。從根本講起,香港人對民主無認識嘛,咁咪搞公民教育囉!點搞呀?你等政府同班沒卵頭搞呀?都可以等下嘅,反正都等咗十幾二十年,唔爭在等到死。咁唔等又點呀?最好搵人帶頭攪下囉,最好唔使太多理論,多啲實踐,咁搞一課「五區總辭」,咪比大家知下公投嘅概念囉,七百幾人同時受教,夠實用未?

但如果要好似你講咁要一步到位先算實用,你不如提議班沒卵頭安番啲卵上去先喇,對佢哋嚟講咁重實用啦!

[引用版主回覆] | 作者 妖夜叉 | 26th Nov 2009 09:26 AM

[4]
妖夜叉 :
PS:2012 最震撼唔係今日,而係 2012 年 12 月 21 日,等下啦,呵呵。。。


好快啫, 三年到。如果係真, 好多人都會死, 仲理鬼佢幾多區總辭、普唔普選。有得食好食, 有得玩要玩......


[引用] | 作者 思見 | 26th Nov 2009 14:30 PM | [舉報垃圾留言]

真係玩得落咁自在?呵呵。。。

[引用版主回覆] | 作者 妖夜叉 | 26th Nov 2009 19:11 PM

[5] Re: 妖夜叉
妖夜叉 : 文少真係唔好意思,刪錯咗!你有無之前嘅留底呀?真係。。。一千個唔好意思!麻煩再POST!

無所謂﹐我無留底﹐轉頭再reply過﹐但你都照刪果篇啦﹐因為太搞笑(笑)

文少
[引用] | 作者 文少 | 28th Nov 2009 03:29 AM | [舉報垃圾留言]

刪咗!哈哈。。。真係忙中可能錯漏多!

[引用版主回覆] | 作者 妖夜叉 | 28th Nov 2009 13:42 PM

[6]

吹水咋嘛﹖放心wor﹖我其實份人好講道理ga~~(笑)

當然﹐係你度吹都係一樣吹﹐我只不過唔想轉貼觀點﹐叫你自己過去睇。

好!言歸正傳。

你講到當年大陸搞果D政治運動﹐就真係唔好提啦﹖阿爺自己鬼打鬼﹐有D人搏亂又執雞﹐搞到天下大亂﹐又搞咩大鑊飯人民公社﹐爭D搞到經濟崩潰...

而又正正因為當年班友鬼打鬼﹐到老鄧坐江山﹐咪決定停止內耗﹐實實際際搞經濟﹐搞改革開放﹐唔再搞乜鬼三反五反反右大躍進文革囉﹖你睇到啦﹐大陸自從唔再成日搞咩咩鬼政治運動﹐經濟就搞上去啦﹖人民總算有餐安樂茶飯食﹐問題雖然仲有好多﹐但總好過三年一小搞﹑五年一大搞呀﹖

至於政治要實用﹐更係從實際角度來講啦﹖

咩公民意識﹑公民教育﹐全部都係務虛的!!你可以大叫潛而默化﹐但我只可話搞得來蛇都死得啦﹖

正如你話齋﹐香港要得到民主難,因為中央會驚呀嘛﹖事實上﹐阿爺都會調查民意﹐而家推普選﹐左仔贏面好低﹐而民主派班友又擺晒款扮襯家...

你要人家下放權力﹐都要人家覺得下放權力有著數先得ga﹖阿爺而家坐正﹐點會無情情讓個莊出來﹐仲要比個所謂襯家坐先﹖唔合邏輯家嘛﹖

換言之﹐要普選得三條路﹕一﹐等阿爺覺得搞普選未必輸梗﹐無蝕底之餘除笨有精。二﹐你硬淨到阿爺淆你底﹐侷住將個權交出來。三﹐反佢滷味﹐做瓜阿爺﹐自己坐正。

問題咪來囉﹖你有咩把炮令阿爺淆你底先﹖你有無能力反佢滷味呀﹖

五區總辭會唔會令阿爺淆你底先﹖定直頭可以收阿爺皮呀﹖

唔會﹐咪得啖笑﹐無實用囉﹖

文少
[引用] | 作者 文少 | 28th Nov 2009 03:50 AM | [舉報垃圾留言]

當年大陸三、五、七九反嘅陳年往事唔講喇,反正都成過去,死嘅死咗,受嘅受緊,重之佢唔再攪就阿彌陀佛!

好喇,講番「五區總辭」實用定無實用呢個話題。

首先,我要延續「實用係對邊個講先」呢個論點。(你千祈咪話我係回帶西)

甲之熊掌,乙之砒霜。

民主黨行得出嚟話要帶領市民爭取民主,我就有權相信佢哋係以得到民主為目的,一切其餘皆為手段。

好喇,喺香港搞民主就預咗好難有運行,呢點佢哋無可能唔知。但如果佢哋真係以得到民主為目的,你就唔計得咁多,有啲野做咗可能喺一方面可能無實質效果,但對另方面就可能有一定效果,呢啲講得市儈就叫「投資成本」。正如你年年出嚟搞遊行,一樣係「投資成本」。

又正如公司啲市場推廣活動或廣告,都係「投資成本」嘅一種。目的係乜呢咁?咪就係要創造一點聲音,引起一啲注意以收推廣效用囉,但無人包一定會有人因此而買你啲野!

咁你民主黨打開大門,拍晒心口話要帶領市民爭取民主,但叫你行出嚟帶頭以「總辭」抗議政府你都因為怕有得失而唔去做,咁呢種算係乜野嘅示範?即係講就天下無敵,做就有心無力咁解呀?知就一早知佢班沒卵頭無用,但使唔使縮骨縮到咁出面?此其一也。

講到實用,對市民進行民主教育同意識嘅提升,係所有自詡為民主派嘅必然任務,因為如果真有民主政制出現,佢哋就要靠大量嘅市民去支持。假使啲市民對民主懵盛盛,咁咪隨時益對家?所以,民主黨既然要搞民主,對市民作言教及身教係好重要嘅實務。

咁家陣你赦晒膊又唔敢攪大佢,但又陰下陰下去講咩;如果元旦遊行破紀錄就點點點,精神分裂呀?搞遊行會比搞「五區總辭」有用呀?無野下話,搞咗好多年喇喎!啲友千祈咪以為零三年沙士五十萬人可以重來,呢啲天時、地利、人和嘅高度配合唔係話有就有。但「五區總辭」未搞過,效果就唔好咁快定論!最少各人有眼見遊行無乜用。

船頭驚鬼船尾驚賊,你重學咩人講爭取?

所以呢,你話實用要睇咩角度,喺人都知從建制派、港府以及中央政府甚至好些市民嚟講係無實用,但你叫得自己係民主派,重要自封係中流砥柱嘅話,就唔好講「五區總辭」無實用。

我篇野係針對民主黨講嘅,所以實用與否亦要用民主黨做對象。

[引用版主回覆] | 作者 妖夜叉 | 28th Nov 2009 14:31 PM

[7] 加油

你寫得很好!喜歡你的文字。加油啊,堅持你所信念的! ! 我會默默支持你~


[引用] | 作者 so me 路過的 | 31st Jan 2010 13:16 PM | [舉報垃圾留言]

謝過。

[引用版主回覆] | 作者 妖夜叉 | 31st Jan 2010 23:00 PM